婚姻

 有無曾幾何時覺得自己另一半好討厭？ 唔知係咪見得太多， 呢一排自己另一半講既任何一句野都覺得好討厭。 可以一日唔同佢講野都唔在乎， 打招呼都嫌浪費時間，訓前唔會say good night,  呢d 生活係咪正常呢？ 我work from home,  而佢好多時下午先去返工， 但佢永遠覺得我係屋企就要服侍佢， lunch 要煮比佢， 打機係我隔離嘈住哂唔當係問題， 屋企無一樣野佢會做，除左自己既野， 係咪所有男人都係咁呢？  屋企所有家頭細務無佢份， 洗衫煮飯洗碗摺衫抹地vaccum 從來無郁過。 細個時仲可以呃下小朋友話爸爸忙工作，而家佢地有眼見會問點解爸爸咩野都唔駛做，我都唔答。 係咪我太harsh 呢？ 要老闆咁辛苦做野放工之後仲要執屋似乎係無可能既事。就連我開把風扇吹都可以比人complain 話我嘈，我係咪仲可以住係度呢？  可能菲傭仲好d, 起碼有人工。 呢d 小事日積月累真係令所有野變得討厭， 但點樣去克服呢？  離婚又不至於既，傾下係我有我講佢有佢睇電話，佢都唔當係一回事，所以我都只好放下。 而家當係roomate,  當係小朋友既爸爸，係咁。 原來想當年結婚既誓詞已經唔存在， 而我，都已經變得無所謂了。 從前一定會為呢d 事喊，而家居然一滴眼淚都無，就知我心已死。 我自問呢10 年湊小朋友真係仆心仆命， 真係好累，再無其他力氣去維繫婚姻，佢想點就點吧。  

2020

原來已經有成兩年無寫blog, 有一日亞女問我，點解要寫blog, 跟住我話好想記得發生過既事所以寫。 而家睇番之前寫落既野，都有一D回味。

我相信2020無人會開心。一個病毒就殺哂好多人。全人類都為打敗呢樣野而努力。我地一家都不例外。 3月到而家真係好漫長。 由一開始小朋友remote learning, 仲希望9月份可以有機會返返學校去上堂， 到而家8月頭都仲有好多case係附近。 真係唔需要再返學校啦。 對的來講，當然好想佢地返學啦。係屋企就算有我地既幫助，點可能真係學到野。 自己上網睇書睇video, 無哂social life, 就快連人都唔需要見啦，唉，好快變左宅女。日日summer就係打機打機TVTV， 叫佢地做classwork就當我發癲，唉，真係日子好難過。 但可以點呢？ 而家推佢地去live class我又會擔心，做亞媽好矛盾呀。  有時我要返office做野，咁佢地就當然比99湊啦。 但好多時我返到屋企時，又要沖涼消毒先，我99就話我咁耐返，其實我已經9秒9準時收工，仲想點？？ 好叉煩。 你咪又係比佢地睇足一日TV， 唔講以為自己好忙。 佢地都唔會點bother你啦！ 真係慘，就算無寫blog咁耐，都可以keep住講99 D衰野，我相信婆媳關係永遠都唔會停。不過我EQ 高，都係唔多理佢！ 同佢講多兩句都哂氣，廢事煩！ 



希望下次再有機會寫唔駛等到下年啦😁

引以為傲

好耐都無update，呢幾日發生一些我覺得好proud既事，都想記底佢。 首先琴日終於收到成績單啦，考天才班出左結果，hannah考出86分，而emma居然考到96!!我發夢都無諗過佢會考到咁高分呢！ 佢之前有補習開，但佢補習時都係focus得唔好，成日都好似遊魂咁，所以，佢有咁高分我真係好好好大滿足呀！跟住今日去左emma學校家長會，所有d comment都好positive, 佢好中意畫畫，老師話佢大個可能做插圖畫家，不過佢真係日日都係屋企畫畫畫，但我都keep左佢好多畫呀！ 跟住今日返屋企，見到hannah比老師pick 左做scholar of the month!!我真係好引以為傲呀！雖然呢個scholar of the month係個個月都有，但我相信都吾容易做到呀！我都覺得佢有進步，雖然D spelling依舊係好差，哈哈哈！不過上次家長會，老師話佢地呢個age吾係要求佢地串字岩，係要佢地sound it out,所以spelling吾岩係情有可願。 好開心既news同大家分享，希望得閒再寫啦！嘻嘻！

摘生果

不知不覺秋天又來臨，平常既9 月已經開始寒冷，今年比往年好唔同，因為到而家10 月尾，都仲未算得上好凍。 咁我當然唔係complain 啦，但時冷時熱d 天氣又真係好易病，朝早佢地返學可以40f,   中午又可以去到70f,  傍晚又可以跌到50f,   d 天氣真係好難搞呀。  anyway,  呢幾排既weekend 都好多節目， 星期六既節目就係學游水同畫畫， 游水就暫時得hannah 學，妹妹個陣去試堂，但instructor 話佢都唔聽人講，同埋都見佢試堂時掛住玩，自己用個浮板就浮出去，個instructor 拉番佢入去咋，唉，咁貪玩又點會肯聽，especially 同家姐一齊去學，更加覺得好玩啦！ 而畫畫堂就兩個一齊學，不過今年呢個class 比較advance,  老師要佢跟住佢畫既畫照畫，基本上都無可能啦，唔好話妹妹，hannah 都有d 難度，同埋可能好悶，妹妹幾次都訓著左，哈哈，真係玩野！ 好就好在個老師係一個唐人亞伯，講中文，佢兩姐妹就學左唔少中文係老師上，唯有當係畫畫加中文堂咁上啦！  

呢幾個星期都去左fruit picking,  上星期我地就同朋友去左apple picking 加 pumpkin patch,  不過可惜d pumpkin 麻麻， 比往年既farm無咁靚，同埋天氣都好陰天，所以去影完相pick埋apple就走lu... 而岩岩個星期就同朋友去左korean pear picking, 本身去個個farm,因為吾駛錢，所以完全係無哂pear, 又臭，總之吾去，之後我地又去左另一個farm, 好彩都吾算遠，個度D pear就好大個，又甜又juicy, 有無打針就吾知，但去到點都要pick幾個返屋企既，佢地兩個都好中意食呀！ 黎緊又halloween 啦，大家既小朋友準備好trick or treat 未呀？

第一個farm, 完全係零雪梨， 搵老襯 👎

同第一個farm比，呢度簡直係天堂，哈哈😁

D梨真係好大架，雖然都無emma個頭咁大

H&M 近況

開學後都真係好忙，朝朝早都趕頭趕命起身，好彩平時都吾係好訓得，叫一叫醒就OK，吾會喊，對亞媽黎講真係好挑戰，好耐無試過6點幾起身啦，哈哈！ anyway,  開學後兩個都係hea爆，hannah就日日都有少少HW，而妹妹咁細個，可能真係無咩野好做，無HW，其實我都無所謂，要我日日同兩個咁做HW，我都真係好很攰，之後hannah開學已經去左兩次fieldtrip, 第一次係去學校附近個park, 而早幾日就去左一個farm去pumpkin pick, 我覺得好開心囉，可以周圍咁去，可能呢邊教學係玩樂中學習，我吾可以話佢學吾到野呀，佢日日都有書要讀，要學認字，不過學英文我都吾怕佢吾識。 跟住下星期又去library， 遲下又會去supermarket, 好特別呀！ 不過最特別係佢地個個星期五都有個cluster, 即係有D特別班上，例如science, 學整puppets, etc, 今個學期hannah就去上cooking class, 不過當然，咁細個都吾會話開爐煮野咁啦，上星期係整個fruit soup, 其實只不過係切D生果mix埋D juice咁，哈哈，不過我細個無D咁既class囉。 

第一日返學，妹妹喊到豬頭咁，原因係......吾中意d uniform咁肉酸，話似police wor....哈哈！😆😆😆

呢個大既就無問題，因為有裙著，無所謂😍

早幾日去farm騎pony, 幾開心！

hannah學校星期三有個free after school, hannah就pick到去學technology, 咁我就要去學校接佢啦，順便就接埋妹妹返屋企，見到我同姐姐去接佢放學不知幾開心！

返黎啦！

開心既時間過得特別快，我一星期係郵輪假期又完結啦！ 真係好想再上番郵輪上面滋滋油油咁過，不過點都要向現實低頭，唔返工就無糧出，唔好話郵輪，出街都未必得呀！

Anyway,  我地由nyc 出發去florida 同bahamas,  聽見都覺得好正呀！ 行程係頭兩日係sea days,  第三日就到florida,  4,5 日就去bahamas,  係sea days 個d 日子其實都係無聊，因為基本上真係食同訓，不停食食食，你知啦，上到船就係得個d 野食，buffet 又重覆都係個d 野， 第一日就覺得正呀，唔駛錢任食，到左第三日就連我個女都話not again!!!!  我都無辦法呀，船上面係得個d 野食，唉，我唔可以話差，但日日食同類野你都真係覺得悶同嘔心啦！ 食足7 日。。都幾難頂！

而我地隻船d 人真係幾懶，咩都唔做，除左去曬太陽，係deck 到係不停見到有人曬太陽啦，玩水啦，activity 好似打波呀rock climbing 呀真係無人去，我經過咁多次都唔見到有人，不過我地隻船都無野做，除左睇show,  唔見其他特別野，係有個小型slide,  但我玩時係要自己行落去囉，一d 都唔slippery,  我老公仲問我係咪太重，食蕉啦，我話個女自己去玩都落唔到我，哼！唯一開心既係，佢地有kids program 可以drop off d 小朋友去玩，我地大人就有時間做下自己野，爽呀！ 你知啦，vacation 緊係都想relax 下啦，同小朋友去既vacation 邊有機會relax,  所以有咁既service 又唔錯呀！ 佢地kids program 其實仲多野玩過我地大人，有d parade 呀，有唔同theme 呀，有得去treasure hunt 呀，face painting,  etc,  真係玩得好開心，我個女係自己要去玩，完全唔係我叫佢去，可想而知佢地係幾咁中意！

Sea days 就無咩好做，去得最多就係gym,  而落船時就去得多beach,  去florida 個陣落船， 就去左cocoa beach,  真係好鬼熱，但D海水涼過又好舒服，不過我地都無落水，係比小朋友玩陣咋，佢地都玩得好開心，我諗無邊幾個小朋友吾中意玩水卦。玩左一陣，就因為太熱就走，同埋之後個日都會去玩水，吾想玩得太耐，比佢地休息下先啦。 

第2日去左norwegian既一個私人島，好靚，D 水又暖又清，唯一係好多石，但一D都吾大浪，好好玩。 我地大約11點左右落船玩，玩一陣就食個lunch， 之後晏晝就book 左去睇stingray, 本來想去snorkel架，但小朋友太細真係去吾到，唯有下次啦，但係因為水太清，咁我地就算吾洗潛落水都可以睇到少少呀，好得意好靚，我兩個女都好開心呀！ 不過睇stingray個陣我就有D驚，我開頭以為好細隻啦，點知好大條同佢地係腳下面個度游來游去，都真係幾得人驚，我兩個女吾駛講啦，真係得個浸水字，哈哈，真係當玩下咋。 之後再去番沙灘度玩多一陣就走，我地都好盡興而回呀，個個都攰到爆燈呀！

到最後一日落port, 就去左nassau， 不過我地因為落左兩日水，D小朋友好攰，就決定做D輕鬆D既行程，就係去水族館，我一開始以為好大，但原來仲細過我以前睇個D，又無咩咁特別，行來行去又熱又攰，所以我都一睇完就吾多留就上船玩好過，因為如果吾落水就真係吾多野做，你可以選擇環島一個圈，但經過既地方全部都係爛屋爛地咁，真係吾去都算了。咁就完成我地今個cruise啦，不過我覺得上船方便因為limit左好多地方你去，但又吾係無野做，同埋你話食野就一定有野比你食，吾駛咁煩自己搵野食。我地食左幾日鬼佬野，真係頂吾順，到最後個兩日都要食番D中國餐平衡一下。 

總括上船玩真係幾relax, 佢地有得玩時我地大人又真係算係vacation! 希望下次有機會再去啦！

新學校

讀埋今年6月hannah 就要上kindergarten 啦，早排為左學校既事都頭爆左好耐，都去visit 過唔同學校，但因為呢邊既system 係睇你地址派位去邊讀書，所以就算你成績有幾好都無用，係睇地址做人， 咁我地址派去既學校係一間麻麻地既學校，即係10分滿分，可能有7 既，咁作為亞媽，緊係想個女去間起碼9 分既學校啦。 開頭去睇學校，但其實都係無用，因為佢地priority 係派比所有zone 既學生先，我就算住係隔離街，間zone school 唔係你既就唔係你，唉，個陣擔心左好耐好耐，諗點樣排個choice 好呢？會唔會有機會入到其他zone school 呢？  個陣都幾stress,  之後發覺係我附近有唯一一間既non zone 學校，即係任何人都可以apply,  不過係抽獎，唔關你學習能力同地址事，咁話明任何人都可以申請，真係唔駛旨意有望，不過到最後都係去番自己間學校，不如試下將佢排第一啦，都係睇彩數，你無得控制。 之前去visit 過呢間學校，其實都唔知好唔好，不過見d review 寫得幾好，有成10 分，d statistics 又唔差，應該ok 卦，不過呢間學校唔死板，唔係好似hk 填鴨式教育， 係係活動過程中學習，所以d 小朋友過得好開心。 其實佢地只不過係5歲，有過快樂童年最重要，眼見hk 幾多學生因為讀書辛苦而尋c,  我更加唔想我d 小朋友咁大壓力， 反正讀書係睇個人，讀書唔好都唔等於大個要捱窮，至緊要健康快樂。  

Anyway,  早排搭subway 時朋友話我知出左result,  咁我即刻上網check 啦，一睇之下，居然比佢抽中左間學校，我真係好想大叫囉，不過因為係subway 上叫唔出呀，個刻真係興奮無比， 其實可能我由頭到尾都無諗過會抽中，仲比左deposit 打算讀私校， 同埋諗住咁多人抽，邊會輪到我， 我真係呢幾日興奮到極點！ 雖然唔知間學校岩唔岩hannah,  但起碼唔駛係我間zone school 已經開心到爆！ 我由細到大，買lotto 都無中過獎，真係估都估唔到呢件事會發生係我地身上，好意外呢！感謝主保守hannah 讀書一事，都睇得出我為學校都煩左一輪呀！

近況

不知不覺原來已經成幾個月無寫blog, 之前講過搬公司太張陽，係office真係吾駛旨意有機會寫，而返到屋企又忙更加無心機啦，真係變左荒廢樂園，我都好想keep住update架！

anyway,  講下呢排近況啦，點解咁得閒寫blog?原因係，我office已經搬左去long island, 而因為我無可能日日咁travel去返工，我個boss就比我work fr home 4日，真係慳左好多時間呀！ 開頭都覺得有D吾慣，因為真係一起身搞掂佢地就做野，直頭吾駛出門口咁，有D奇怪架，但做做下又OK既，吾駛同人迫車，好爽，哈哈！ 而我又join左係附近個gym, 決心去work out下，起碼都算係有個目標呀，哈哈！我而家多數就8點去gym, 9點返到屋企就沖個涼做野，做到大約4,5點又鬆人，有時無野做，仲可以清潔下屋企，聽下歌，hea下......都好開心架，唯一就係好似有D自閉，完全都吾駛同人溝通，不過有得必有失，睇下你自己想邊樣多D啦！ 咁我多D時間做屋企野，咁我wkend又真係可以休息下，比著以前，wkend係不停洗衫揩衫煮飯洗碗，真係有D吃不消呀！所以而家可以分開D做，我個人又可以relax D, 無咁stress, 好幸運！ 不過吾知可以keep到呢個position幾耐架，都係個句，做住先啦，嘻嘻！ 遲下我地一家幾口上船玩幾日，真係可以休息一下啦！

4眼妹

早兩個星期衛生局去hannah 學校驗眼，我初時不以為然，會有咩問題，點知放學個陣收到封信，話hannah 隻眼可能有問題，我先識驚。  星期六就同佢去驗眼啦，我老公仲話可能佢係玩玩下驗得唔清je,  去驗眼個陣佢都好聽話，醫生叫佢讀d 字佢都會讀，不過細粒d 既就睇唔到，最後結論係，佢要帶眼鏡，唉，因為兩隻眼既度數相差太遠，返屋企更加要訓練佢用壞既眼睇野，我個日真係晴天霹靂，雖然帶眼鏡好平常，但無想過係會發生我個女身上，我返到屋企又喊，又怪自己唔開恆d 燈佢睇野，又怪自己無好好留意佢，但其實有好多野都係天生，我只可以認命吧！ 安慰下自己，佢大個中意咪做lasik 囉，無問題wor,  況且我自己都有帶眼鏡，無咩所謂啦！ 雖然要長期帶眼鏡，我都有d 唔慣，不過睇d article 話，如果而家唔fix 好去，再大d 先發現就太遲啦！發現得早都未嘗唔係好事。  琴日拎左眼鏡，佢見到都肯帶，又覺得好好玩，不過我解釋佢聽你隻眼唔舒服所以要帶眼鏡呀，佢就話好似爸爸媽媽一樣，雖然見佢帶眼鏡我都未係好慣，不過為左佢將來隻眼好，點都會帶架啦，日日既訓練都事在必行。 希望佢既弱視會快d 有進步，咁佢就唔駛咁辛苦做獨眼龍啦！ 加油hannah!!  

happy new year (belated)

原來有成3個月啦，真係忙到吾知邊到開始好！ 點解咁忙？因為office無得再寫blog, 連網都無得上，好鬼慘！anyway, 希望大家都過得好啦！新一年（新同舊都過哂，哈哈！），希望大家身體健康，心想事成！ 

新一年有好多轉變，其中一樣係份工，本來搬左之後就諗住settle, 點知突然間又話要搬去long island, 我都吾知點算，咁新老細就話，不如work fr home 4日，其他時間就返office，咁我都OK既，可以試下，其實本身未有呢個問題前，我都好想話work fr home, 因為我覺得自搬左office後，時間少左好多，可能因為commute又長左，我平時可以6點左右返到，而家如果無任何問題既都起碼6:30, 我覺得我需要多D時間放係屋企上面，同埋我weekend真係做吾哂所有housework, 洗衫乾衫摺衫已經好多功夫，所以我寧願日日做D，雖然我地個個對個新老細印象一般，但我都係打份工je, 同埋佢好在好flexible, 佢吾理我地幾時返工放工，as long as你做哂D野就OK，吾係間間公司都可以咁，所以我先想考慮keep住做，雖然今日吾知聽日事，但希望可以做住，做到小朋友大少少佢地可以take care到自己我再諗自已啦！ 做ftm我又吾想，因為會好悶同埋經濟吾容許，希望呢個plan可以work out啦。  再加上我62呢排都吾得閒幫我湊女放學，如果我可以work fr home, 我就可以早D做野，準時收工，容易控制D。 😃

早排亞媽佢地過黎過中國新年，其實佢地係度我都開心，除左話幫下手之外，好似有個親人係身邊好吾同，雖然黎得個10日，但我就係屋企做哂所有野，吾駛煩，陪下佢地兩老啦，講真，都吾後生，吾知仲可以飛得幾多年，可能我地隔兩年都要返HK探佢地一次，無計，自己父母可以點，已經吾可能係身邊照顧，唯有得閒就去探下佢地啦！ 時間過得真係快，原來我對上一次返HK已經差不多成年，點解可以飛得咁快架！ 今年返HK就應該未必，或者下年啦！ 

咁又11月啦

已經係半放棄狀態，有d對唔住自己，但時間原來真係十分寶貴， 無左返工寫blog時間，返到屋企忙得7 碌，真係唔放棄唔得，希望d blog友仲記得我啦，嗚嗚！

其實呢一個月真係超級忙，因為99 返左大陸3 星期，我就自己忙足3 星期。 佢未返大陸前，我仲同我老公講，叫佢盡早返屋企呀，我要煮飯又要睇住佢地唔容易，佢話ok,  點知由day 1 開始，最早個日返係9:30pm,  我個幾星期真係stress到爆，加上d咳又唔好，我起碼足足咳左一個月，唉。跟住晚晚都趕頭趕命返屋企煮飯，好彩係我可以work fr home幾日，唔駛咁趕，仲可以係屋企煮落d野先，不過返工個幾日，我基本上都係煮d麵呀，意粉呀咁咋，大型飯局真係唔駛預我！ 咁就捱左3 個星期，好彩佢兩個都算係咁，都會一齊玩，唔會超bother我。  不過無左我老公係身邊，同埋自己又未好得番哂，所以先捱到病。 雖然唔駛落去99 度食飯都有d開心， 但暫時都仲係太忙，佢煮埋飯就最perfect.   

早排學校有個superhero day,  咁我地就買左套衫比hannah著，哈哈，係咪好型呢？

 其實係佢自己話想做catwoman,  咁我地就買比佢啦，點知出黎效果真係好鬼型，哈哈，型到佢唔肯除底， 不過都ok啦，一日半日，如果唔係就真係生熱痱呀！同埋因為jumpsuit,  去廁所一定超煩架。 emma都有架，不過佢唔多肯著，真係好夾硬迫佢著上身影張相咋。 

之後halloween,  有人又話要做 fairy,  咁我地又要買過另一套，真係好鬼忙同貴囉， 不過見到佢地開心我地都開心既。  我之前請左d朋友仔黎屋企搞個halloween party,  不過都係一齊玩下食下，小朋友就當然要著costume啦！ 都過左好開心既一日呀！

工作方面，我早排都忙到透唔到氣，可能因為quarterly,  要file哂所有report,  實在忙到嘔， 跟住d client又 incompetent,  我又不停有deadline,  今個星期真係算輕鬆d咋， 新個老細又咩都唔理，我見佢既日子真係十隻手指數到，因為佢多數係第二個office做野，出去nyc就少，但作為新老細，係咪都比d effort扮下野，唉，好彩我地幾個舊同事都係好自動波，知道自己既責任係邊度，如果要搵佢黎幫手，真係十世都搵唔到，不過最慘係我舊老細半退休咁，所以好少係office啦，我如果需要佢地，就多數用電話，但有時電話真係唔夠真人方便，唉，咁又可以點，不過而家好就好在可以好flexible,  遲到早退無人理，work from home又得，請假又得，最緊要係deadline交到貨就得，咁算唔算係好呢？ 同同事傾過，佢話而家真係flexibility好重要，esp我d小朋友咁細個，真係好需要我地， 加上如果小朋友唔舒服呀，你唔會話take哂你d time off而無哂d vac day,  所以雖然一開始我都有d想搵第二份工，但見人工又ok,  又咁flex,  我諗出面無幾多間公司接受我遲到早退卦. 只可以同自己講，做住先啦!

希望keep到一個月一次啦，哈哈! CIAO

近況

早排病左一輪，而家已經好番啦。 其實早一輪真係好stress,  事緣係有一日，我62 同樓下個位殘障爸爸講佢個仔好難教，成日係咁掉野， 跟住個位爸爸因為唔比人話得個仔就發哂老脾，搞到我62 激爆，之後仲話以後唔湊d小朋友， 包埋我個d,  我真係係無辜，做左炮灰，就係咁個排無人接送我地d小朋友。個殘障都有病既，話我62 無做過做亞爺責任，咁幫佢養埋好無？ 跟住我99 話佢有時工作壓力大， 嘩，呢個excuse都關係？ 咁壓力大殺人都得啦。  就算62 點差都好，都算有個人幫手接送d小朋友， 佢d要求超無理，不過佢地家人都慣左發爛渣架啦，少少事唔順意就搵人出氣，癲！anyway,  我同我老公就幫手送d小朋友返學，不過湊嬲人地個家人就真係唔覺有咩大貢獻囉，咩都旨意哂99....就算鐵人都會有一日病。 有一日我99 仲要拖住4個小朋友係街上，真係好牙煙！！  就係因為個陣接送小朋友好stress,   搞到自己病左。   一開始病時都唔覺有時，仲以為係尿道炎，因為痾peepee時有d burn,   好記得星期五晚，痛到我訓唔著，我以為咩事，成晚無訓真係慘絕人寰， 星期六一朝早就去睇醫生， 睇過醫生，前後唔駛一分鐘，完全係老點， 我同佢講我d病徵，佢就話係尿道炎， 跟住我話我patpat位置生左d rashes,  好痛，佢就就咁是但開隻藥膏我揸，本來諗住揸完後會止痛，但揸左一次都唔覺有效，夜晚依舊係訓唔著(對一個平時一上床就訓得著既人來講，痛到訓唔著真係幾大件事),  我星期日再去睇醫生想叫佢開d藥我止痛，跟住間診所又另一個醫生，不過呢個醫生就詳細d,  真係問下我咩事，我話我patpat位置生左d粒粒，好痛，痛到訓唔著，又有d痕，不過主要係痛，我就算連坐都痛，跟住本身佢話叫我除比佢睇，但我又唔想，因為男醫生， 咁佢都只可以憑我講既去診斷， 佢話，唔可以100% 肯定，但我有可能係皮膚發炎，又或者係shingle,  即係生蛇， 跟住我諗，唔係卦，生蛇，我以為係50歲先會生，不過佢照比左生蛇既藥，又比左皮膚敏感藥，又開左枝所謂止痛藥膏我揸，不過都係治標不治本，但總好多咩都無啦。 之後夜晚，雖然都食左d藥，但唔覺有好轉，咁星期一再決定去睇專科，一開始打算去睇婦科，因為係個個位置，其實都幾尷尬， 跟住我星期日晚返屋企睇d article,  話如果真係shingle,  係只會生一邊，同埋係好似burn同比針拮既痛，咁我就斷定自己係生蛇，星期一我就同我老細佢地講，佢地話生蛇應該去睇皮膚科醫生，咁我就book左個皮膚科醫生睇，去到醫生度，我就話佢知我d 病徵，跟住比佢睇過d 疹， 再話佢知我有邊隻藥，有尿度炎藥，有皮膚發炎藥同生蛇藥，仲有兩枝藥膏， 跟住佢就證實我係生蛇，佢話唔一定係50 歲先會生，只不過係50歲後生既機會大d,   d virus本身已經係身體入面，有時如果好stress既時間，身體個immune又差的話，好易wake up番d virus,  而令自己生蛇， 佢話叫我唔駛食之前開既藥，佢開另一隻專係for shingle既， 叫我食一個星期， 一星期後再去覆診， 真係好彩決定去睇個專科，如果唔係真係唔知幾時好。  anyway,  睇完醫生後都安樂d,  雖然都係好唔舒服， 個排一坐底就痛， 要坐係另一半既patpat先無咁痛，但係office基本上都係長期坐，真係痛不欲生呀。  我講真，生蛇真係痛過生仔，因為真係長時間折磨你，你痛到訓唔到，坐又坐唔到(咁岩我個位置係咁),  唔係一食藥就有效，一食藥時係唔好比d shingle spread out,  我睇過d article,  如果生係面，生到上眼有機會盲架，好得人驚！！！ anyway,  食左幾日藥就開始有好轉，但因為shingle係一d神經線痛， 所以食哂藥後patpat位置都仲痛左一排， 唉， 就係因為一d人地搞出黎既問題triggle我d病，真係好唔抵。   好彩既係，隔左幾日，我叫62 幫我接送妹妹佢都ok,  其實我地本身無野，只不過係人地搞成咁，同埋我覺得我d女都唔算太曳， 係有時比較emotional,  總括都算係ok.    而家希望d人唔好再整興我62,  咁我就無咁stressful啦。

怒呻

激氣事不嬲都有，但呢件事都要記底去先。
本來已經少寫blog,  但唔呻下我會勁辛苦，所以都係呻左先算啦。 我唔係想再講人地，不過影響到我既野我唔可以唔講。

事緣係，我99 打算10月返大陸探親，咁我地緊係要arrange下點樣接送小朋友。 我個陣返hk,  已經拎左兩星期假，跟住我又岩岩轉左地方做野，同埋上個月佢地去旅行我又要遲到早退返工去接送hannah，趕到我！所以一早mark 左62 去幫我手接送佢地去學校。  anyway,  本身99 想10月頭去，10月尾返，點知個d殘障突然同佢講話，oh, 我地book左機票去玩，10/10先返，搞到99 d schedule都亂哂，因為佢本身係10/10同佢自己亞媽慶祝生日嘛， 而家我唔知點lu.    咁因為我99 去旅行，咁佢地就要搵人湊d小朋友啦，咁我就話，上個月我已經遲到早走，無可能成日都係咁，所以我叫左62 去接送hannah同emma,  佢話無問題， 咁問題就黎啦，佢地就係度勁bitch,  話佢地無咁多假，叫左婆婆請一星期假，其他個d就自己拎幾日，都仲差幾日，就叫我地請幾日去接送hannah,  講真，我請假應該唔係問題，問題係佢manage我d野我就勢係假。佢地無假係佢地自己事，邊個叫佢地拎哂d假去旅行，點解我要成日都圍住佢地走？神經病。 咁佢地自己有假，又明知99 要返大陸都唔留比自己用，咁佢地咪on 9 囉！ 只係識得享受自己，完全唔會理人地d schedule.  好黑我憎。  咁琴日我同99 反映完叫佢地自己搞掂，佢地就好唔gur,  跟住99 話佢地有假都唔留d比小朋友，佢地就話我地既時間識自己manage,  唔駛你理。  係，識manage自己去玩時間， 但唔會理人地囉。  跟住我99 就話叫公公請幾日幫手，佢地就話，佢唔洗做呀？咁我同我老公又唔駛做咩？ 痴痴地線。  總之，有d人逆佢地意就勢係假。 問10 個parents有10 個都會留d假比小朋友，佢地直頭唔係parents tim,  佢地個陣返hk去左兩星期，岩岩去carribbean又去左一星期， 跟住10月又話去10日， 用假咁chur,  咁梗係啦，所以呢d人唔駛幫，都唔抵幫。  我99 話佢地去旅行影響唔到我地，我咪話佢地就係因為拎哂d假去旅行而家無假咪影響到我地囉！我講得無錯架！ 我地個家，有咩事我地都自己搞掂，唔會影響人地，而家佢兩條廢柴因為自己要享樂而影響哂所有人就勢係假！ 所有d公公婆婆嫲嫲爺爺永遠都要圍住佢地轉，我就算想搵人睇住佢地一晚我地都唔敢望，除左我亞媽黎我先可以算係休息個兩星期。

多謝大家聽我呻，佢地兩個應該放係高登比人地搜查下佢地d衰野。

7月札記

自從返左新office後，無得寫blog之餘連internet都上唔到，日日要扮做野都幾難過，不過就好productive,  好快就做哂d野， 雖然我老公話咁你打工就應該係咁，但我都想有時做下自己野嘛。

Anyway,  7 月咁快又過得7788,  呢邊既summer基本上係得7,8 月，所以個個summer都會將d activity排得好密，無計啦，天氣一凍就唔可以出室外玩，唯有趁呢排天氣暖就chur盡去。 summer第一次去沙灘+bbq,  其實都幾辛苦，因為又要帶好多食物，同埋燒野個度唔係沙灘入面，所以基本上好難玩到沙同水， 下次都係齋去沙灘玩算。 

有個wkend無咁忙， 就同佢地去屋企附近個park玩， 雖然唔平，但佢兩姐妹一齊坐住玩，都好開心呀！

老公cousin係LA飛過黎，因為佢個女想過ny讀書，想過來睇學校。  我係度諗，如果將來我個女話要去第二度讀書，我應該跟住佢呀，定係放手比佢自己去呢？  我之後又諗，想當初我自己一個飛去老遠留學，我又會夠膽而我父母又無所謂既？  或者佢地放心我唔會亂黎卦。  umm.. 咁多年後，真係到時先算啦，哈哈。 

99 話我知佢要同樓下去旅行，即係叫我自己湊番d女， 我岩岩轉工，又要遲到早退成個week,  佢都係諗自己架啦。 佢開頭話叫62 湊hannah返學放學，我怕，所以唯有自己頂硬上，返到屋企仲要煮飯洗碗，一個星期幾難捱，不過係屋企食飯就開心d,  唔駛對住d唔想見既人。   係99 飛左後，意外就發生， 一朝早兩個女係度玩門，emma匿係closet門後，hannah就關門，點知emma隻腳指甲比度門整反左，心痛c我呀！ 不過佢係喊左幾聲就無野，照玩，我都唔知話佢强定貪玩！ 咁好彩62 同佢睇醫生，醫生都無咩野，但我就無左3魂7泊，好驚好驚！

上個weekend去左朋友仔生日會，天氣好熱，熱到我都無咩心機，好彩個度岩岩噴水淋花，d小朋友就有d野玩，哈哈，額外娛樂都幾開心呀！ 我兩個女有野玩就開心架啦，熱唔熱對佢地黎講係無咩所謂！

Hannah學期尾表演

未開始前，因為搬了公司關係，再唔可以係office寫blog啦，所以將會少左好多篇關於小朋友既日誌，無辦法啦，鬼叫而家無得hea咩。

Anyway,  不知不覺又學期尾啦，學生至中意梗係放暑假啦，不過我地呢d要返工，唯有帶佢地去summer school啦，哈哈。  琴日就請左日假去睇hannah 表演，一早已經打哂底話佢知唔駛驚，同自己加油，不過我相信係我驚d,  因為經過上年喊住收場，我幾驚佢會重蹈覆轍， 可能真係大個女啦，真係估佢唔到呀！ 媽媽絕對感恩呀！ 

2016 香港遊 - day 10

今日自由活動呀，一開始因為亞媽唔放得假(要湊小朋友), 所以就叫我亞爸請假同我地玩，講真，我同亞爸唔算好close,  佢又成日唔知自己講咩，所以好多時都唔想同佢講野，不過佢請假車我地去玩就放便好多既。  可能之前同我亞爸講左幾句話亞媽都唔得閒陪我，亞媽就抽到一個lunch時間陪我地去飲茶，唉，真係多到呢。。。 之後我地就去左元朗個playhouse到玩， 嘩，一開始時佢地訓左覺，之後到左佢地就醒，見到個playhouse咁好玩真係開心到無朋友呀， 不過要亞爸坐係度陪玩就真係悶到發癲。  講下個playhouse,  我覺得真係幾好玩呀，不過我地大人就真係攰d,  要彎腰咁同佢地爬來爬去，真係唔好講笑， 個度有好多唔同既野玩，但最開心係有個波波池，真係玩得好開心，而見到d color咁色彩繽紛我地都開心哂。 呢度可能係佢地返hk至好玩既地方，價錢都唔算貴，玩足一日咩都抵哂啦。 不過朋友話可能因為wkday 所以唔多人，咁都係，無拿拿邊有人去玩，我地真係霸哂成日波波池咁架，勁正！ 不過到放工時間又好似多d小朋友來， 但個d時間我地都要走lu..... 不過佢地玩得好開心，我又比佢地玩得放心，highly recommend!! 

夜晚我約左朋友食飯，而老公同佢地就自己同屋企人食。  難得既我無小朋友食飯，好開心呀，跟住又約左兩個blog友仔，嘻嘻，多謝你地呀！ 其實今次都係第一次見面，不過因為之前係blog度已經了解好多，所以又唔覺得好陌生。  大部份既blog友都係識於微時， yahoo blog既年代真係令我認識唔少朋友，但而家要睇過新朋友blog,  如果唔係有人介紹既真係唔知點樣可以認識。  好多謝oli山長水遠都過來元朗同我食飯，又多謝yan你比我有機會見到matthew and chloe,  佢地真係十分得意呀！！！！！！！ 雖然佢地兩個今次無機會同hannah and emma去玩，希望下次有機會啦，不過唔知係幾時既事lu,  嘻嘻。  食餐飯傾一陣就已經夜啦，時間過得真係快， 好彩返到屋企小朋友已經訓哂，唔駛我再做牛做馬，哈哈哈。  我地就儲足精神準備明天，因為明天要去海洋公園呀！！！！ 期待！！！！！！！

2016 香港遊 - day 9

唔駛講，指定動作就係一早起身啦，真係想訓多一陣都無可能。  不過今日行程十分豐富呀，所以休息真係no way.   

我家姐一早就book左一家人去影全家褔，係呢邊都無做過，所以去試下啦。 一家10 口去影，你估有無難度？ 4 個蒸生瓜，唉，比佢地舞到我暈呀！ 一開始時，可能唔知發生咩事， 佢地都少少合作，不過笑容就當然欠奉啦。  佢地個樣係，發生咩事呀？ anyway,  到影左一陣後，emma已經不受控制，c都唔肯比我抱，要落地，唉，佢一扭，其實無人可以控制到，因為佢又大力，又狂lur,  掙扎得好勁，以我d功力係完全唔夠佢爭，所以搞搞下又喊又性，唉，真係頭都痛哂，跟住其他d小朋友都開始發癲，唉唉唉。。。。。。。 ok,  唔影我地先，諗住比emma calm down下先再影，跟住佢d狀態都係咁上下，一係好hyper,  一係就狂喊，我真係無佢呼呀，之後到我地一家4口影，佢又係走夾唔頭，因為佢唔中意比人捉住佢，呢輯相，絕對係出哂汗之作，又走來走去，又扭到發癲咁，我個日真係比佢地搞到痴左線，連dd精力都真係無哂！ 之後我地都放棄左，是但掉d恐龍，蛇比佢自己影，襯番佢d恐怖性格，個攝影師話我地係佢影過咁多人中，係top 3 難搞，我心諗，你自己都無野氹佢地啦，至叻咪就係開架爛鬼ipad囉，跟住收到d相又話touch up過，我真係一ddddddd都唔覺，我自己執應該仲靚d,  哼。 

哈哈，emma D相就係咁，完全係吾知發生緊咩事，點解要擺pose呀，哈哈哈哈哈！ 所以D蛇呀，恐龍呀真係勁襯佢！

hannah就好少少，不過婆婆真係花盡心思去氹佢佢先肯笑咋！ 係得呢兩張見得下人咋

影完相，我地就食個lunch就亞爸車我地去深井meet up我d blog友， 其實我係一個好怕羞好慢熱既人，第一次見咁多未見過既人我真係有d擔心，因為我講野唔叻，又唔係多野講，係blog上可以任我點講都得，但係現實生活我係一個好靜既人，除非我同個個人好好好熟啦，所以可能係個blog gathering上我係比較靜，加上我朝早比人發癲完一輪，我真係其實有d攰。  anyway,  我都好期待呢個gathering呀，我好記得我知道會返hk後，好多blog媽媽都問我幾時返，想約我出來，我都好興奮呀，雖然呢個檔期係比我家姐講左幾句話我weekend唔係應該陪屋企人咩，但任性既我覺得除左屋企人外，朋友都重要，所以我抽左幾個鐘頭見到我d blog友。  其實朋友我已經唔算多， 真係係yahoo blog開始就識呢班blog友and而家仲keep到，我覺得好安慰，加上大家都係睇住大家d小朋友大，我更加覺得好似見到親人一樣呀。  首次要多謝檬媽做搞手，佢真係好唔話得，我覺得打搞到佢唔好意思，不過佢兩個小朋友都好乖，好聽話，好得意，好開心見到佢地一家，而我好surprise係我地係門口唔識路，我打比佢佢出黎接我地，hannah居然比佢拖住手，又會咁既？ 因為平時既佢真係cool到爆架，檬媽果然有一手，嘻嘻。  入到去後就見到肚b一家同 南瓜仔一家，真係好似見到d好耐無見既朋友呀，不過hannah同 emma唔係好熟其他小朋友，所以都係自己兩姐妹玩多，唔緊要啦，真係純係想見下面架咋。  錄續d blog媽媽都來啦，真係有好多小朋友，而佢地雖然係第一次見，但真係感覺識左好耐咁，仲有好榮幸燒腩媽咁大個肚都抽時間單拖見我地，真係好幸運呀，又好彩佢仲未生咋，如果唔係就緣慳一面。  跟住見到一仔媽，小寶媽，anki媽，巨family媽， 妹豬媽， 小b媽， 個個都係yahoo時代識架，真係睇住佢地大呀。  如果未能同你地傾到計，真係唔好意思，話哂要睇住兩個小朋友，都有d難度架，雖然係一個房入面，但我比我老公train到隨時要alert,  好煩。 唔知係咪emma食左chocolate關係，心情hyper到不得了，好似癲左咁呀！ 我幾驚佢打人又推人。 佢真係滿場飛，叫佢坐就企，叫行左就行右，呢隻馬騮真係難纏呀！ 我見其他小朋友乖乖咁坐定，唉，真係失禮哂。   跟住玩左陣，影陣相，我地移步去隔離玩slide, 而係隔離房就見到little k 媽媽， 呢個emma見到slide真係發癲咁，見到slide即刻沖去，仲要唔睇就sir落去，嚇到d爸爸媽媽都嘩一聲，佢真係十分瘋狂呢！ 希望無推撞到其他小朋友啦！ 開心時間過得好快呀，一開始集左小小郵後，有d就唔記得左影，希望下次返hk再有機會約大家啦， 不過真係唔知幾時既事lu...... 好多謝大家抽空來見我呢一家呀， 都多謝大家係hk時比左好多資料我！

走個陣落大雨，好彩亞爸接我地，如果遲幾分鐘上車就真係好呢hea.  我地夜晚去join家姐佢地去半島食飯， 其實唔知係咪佢地慣去d咁既地方食野呢？ 對我來講好grand,  好靜，如果我選擇，我會中意去d大排檔地方，哈哈。 食物方面，ok啦，無驚喜， 得個靚字。  環境舒適既，但太靜好唔慣，哈哈哈！  未食dinner前，因為兩隻野訓左，我同老公就去行左陣，不過個一陣真係搵完路都要返車，感覺上係好似旅行團咁，要幾點去返邊到等。。。。 anyway,  終於食到我想食既綠茶雪糕，不過食完後都好飽lu,  難怪dinner覺得無特別啦！食完飯後既感覺係，wkend完啦，即係我地就快要飛返ny啦，有d不捨，雖然hk既生活已經唔係好似以前所響往，但始終自己係hk出世，hk生活咁多年，同埋屋企人係個度，唔捨得。。。。應該係人之常情吧。  雖然唔知幾時會再返，但係hk既hk生活永遠係我腦袋入面。 

睇呢兩個亞姐，真係成隻馬騮咁，勁難搞！

難得同肚B既一張相，不過無左hannah

亞女，想搶鏡都吾駛咁卦 

大合照，無左D餅同糖真係吾駛影！

全女班，個個都好靚女呀！

以為好斯文

原來好open....個口je, 哈哈

睇佢個樣就知道玩得幾開心啦.......吾止開心，係癲咁呀！

再一次多謝大家既招待，希望好快會再見啦！

4 歲生日啦

等我skip 一skip 香港遊先，講下個女生日先。 話咁快就4 歲啦， 真係好似眨吓眼就過。 媽媽希望你聽教聽話，健健康康， 唔好成日發牢騷， 幫下媽媽手，照顧妹妹， 開開心心。 其實今日本身打算係星期六搞生日會，但偏偏我又病，hannah又病，我真係唔好意思叫人來啦，唯有postpone到下兩個星期啦。  好彩佢星期五都有返學慶祝到佢個birthday,   同成班同學仔慶祝，又真係特別d既。 

Hannah公主，我既小寶貝，希望下年再搞birthday party唔好再病啦！ 至怕你地病呀！！ 不過係hannah生日正日， 輪到妹妹病啦，無陰公，唉， 搞到好掃興呢。 本來我地去左個museum,  因為妹妹突然間發燒，已經呆呆滯滯， 咁唯有走啦。  我知hannah仍然想玩，但佢都好明白因為妹妹唔舒服而無點扭，好彩好彩！ 我諗大家既生日願望就係一家大細都唔好病，健康快樂呀！  媽媽會為你補祝你個生日，放心啦！

2016香港遊 - day 8

終於等到weekend啦，可以陪下屋企人，我地一早就plan好星期六去disney,  我地一家10 口 就一齊衝入呢個夢幻樂園啦， yeah!   去到時雖然都係岩岩開門， 但見到已經超多人，驚呀！ 跟住我地就跟住我家姐去玩， 因為佢有pass,  所以都來得多，熟路過我呀！ 我地第一樣野就排去玩揸車，佢話條隊唔係好長，但去到之後，真係覺得比佢握左，我地排左成個鐘先有得玩呀，咁都話唔長，佢話平時仲耐，唉，真吹脹， 算啦，話明一家人去玩，咁我無理由唔去je.   跟住排排下隊，有好多人係後面行去前面，下，咁都得？ 跟住個d人就話我亞媽係前面呀，blahblahblah,  呢d風氣真係幾差，我之前去過美國disney,  真係未見過有咁既事囉，又或者係d菲傭去幫手排隊咁，咁即係點？ 我地唔駛玩啦！可能thats why要排咁耐囉。 其實我全日都見到d人係咁由後面行去前面架， 一d又話唔記得拎衫，有d話d朋友係前面，我最記得係我地玩木馬個陣，有d b6 係前面，後面就有d人打尖， 跟住我睇下個牌，真係有句話叫人唔好打尖，可見個度d人真係經常打尖先係咁啦，仲有d工作人員會叫d人出番來囉，我覺得好搞笑，其實去玩je,  排個隊又唔係好難，更何況我見個d b6, 係大人，即係20 幾歲個d後生仔女，排一陣唔會腳斷卦，唉。 返來之後，我覺得呢邊d人真係算有禮貌，搭升降機有小朋友會讓你架車入先，開門會幫你hold住，跟住你幫人人都會講聲thank you,  係hk有d咁既待遇？ 一次都無！！  anyway,  玩完車車後，我地就去隔離玩埋個巴斯光年， 細膽既hannah嚇到想喊， 真係。。。 其實只不過黑d同見到有d alien,  唉， emma唔駛講啦，玩得十分有12 分興奮，佢兩個可唔可以mix下呀？？  不過慘慘係我父母基本上去係陪坐同陪b,  因為佢要幫我家姐手睇住個女，咁佢先可以一齊玩， 好彩中途都有我姐夫睇左bb一陣，咁先可以同父母去睇過小小世界咋。 雖然大部份既野我都睇過，但有小朋友後真係第一次同佢地去旅行同去disney,  所以都好開心呀。  中途落雨，我地係food court出面避雨，咁我地有小朋友，落雨當然擔心小朋友凍親咁啦， 個度d工作人員係咁話叫我地唔好阻住條路，大佬呀，落咁大雨唔避雨個個都stupid啦， 咁想點？ 跟住我姐夫又推住個bb車，佢就鬧個個工作人員話佢知我地去得邊？ 落咁大雨又推住架bb車，佢仲好燥底咁問佢咩名，要投訴佢等等， 嘩，真係驚！ 我老公都係燥，但我會拉住佢囉，但我姐夫真係連環地噴火咁，唉，hk人真係好燥，仲要係兩句唔埋就投訴，ummmm.... 好彩最後工作人員都無再出聲，如果唔係又麻煩啦！ 其實玩既野真係唔算多，我印象中，係玩過賽車，巴斯光年，騎木馬，teacup,  小小世界， 好似就係咁咋， 不過行下食下休息下再shopping下，就咁又一 day,  不過都開心陪亞爸亞媽同家姐成家一齊去玩，真係唔知幾時再有機會呀。  

唔知係咪玩左成日太攰，我地個晚好鬼肚餓，因為我家姐知我想去食海膽，佢就帶我地去一間我姐夫識人既日本餐廳，真係食指大動呀！ 間鋪雖然唔係話十分靚，又唔係係街鋪，但佢真係日本人開既，同埋d野好新鮮，好鬼正！ 我地唔識叫架，我姐夫就叫哂所有野，真係好好味呀！！！！！ 來左香港咁多日，真係先係第一次食得落野，好彩個日個胃都算聽話，真係食極都有呀！ 我至愛既海膽真係好鬼好味！ 搞到我都食左幾舊，但真係太飽啦，跟住佢d魚生又好新鮮又肥美， yum yum,  而家諗番都好想再去食呀！！！！！！！雖然之後find out價錢都幾拿利，但原來係hk食野，呢個價算係咁，之後好幾次想係呢邊食番呢種感覺，真係搵極都無呀！ 唔好話睇價錢，唔睇價齋食都唔覺得係好味囉，仲覺有d唔抵呀！ 盡興左一日，真係好開心， 雖然係好攰呀，但同一家人一齊玩，唔個係無價，見到d小朋友一齊玩，我都覺得好開心。  

下一日就講到約左班識左幾年既blog友啦！ yeahhhhhh

 呢個小朋友，食到幾污槽！

 海膽同魚生真係十分鮮味呀！！！！！！！

多謝姐夫呢餐，真係好好味呀！