迷信

「大肚婆唔可以移床，唔可以舉高手，唔可以揼釘，唔可以呢樣……唔可以果樣……」中國人傳統迷信和禁忌特別多，雖然宜家係廿一世紀，但傳宗接代不容有失，所以不少潮媽雖然自覺這些禁忌是迷信居多，但都會照單全收，跟得就跟。

信還信，好多潮媽聽聽埋埋好多傳言但又無記性經常唔小心犯例，結果令自己嚇餐死。其實，好多「食腦」的孕媽媽已經識得用現代方法和態度去對待，令自己心安之餘，亦可以減輕因要遵守規則而產生的壓力。

個案一：大肚唔准裝修？

小慧同丈夫一直過着二人世界，但最近突然發現自己有喜，她很想將書房改裝成BB和工人房，為小生命來臨做好準備。不過，小慧聽長輩說大肚不可以裝修家居，細微如看着別人上螺絲都不可，因為可能會令胎兒出現先天性缺陷。小慧聽罷本有打消裝修的念頭，但後來考慮到孩子出世後才裝修會更不便和更混亂，掙扎了幾日她終於決定找朋友商量一下。

後來，好彩小慧多得朋友教路，其實方法好簡單，就是「避之則吉」。她叫小慧在裝修期內收拾小量行李回娘家暫住，每當她想要視察裝修進度時，便先致電通知裝修師傅一聲叫他們停工，或遇有要鑽牆鑿東西時，她可以落電梯大堂暫避。此外，小慧又叫丈夫拍下一些已完成部分，讓她可以遙控監察。此舉既簡單又可避免小慧在工地逗留，吸入灰塵影響自己和胎兒的健康。

個案二：移床會驚動「胎神」？
有時想遵守迷信亦會出現技術性困難，香港寸金尺土，很多家庭為了增加儲物空間，都會選用油壓床，以便能放置被鋪和換季衣物。潮媽洋洋亦是選用油壓式睡床，去年中開始懷孕的她在丈夫和奶奶嚴密監督下，凡事都很小心和避忌，但直至個多月前天氣開始轉冷，聽天氣報告得知未來數日會有寒流襲港，於是她要求丈夫和工人代勞，替她把床下的被鋪和衣物都拿出來換季，豈料奶奶即時斬釘截鐵說「唔起得張床」，說會驚動胎神，叫她和丈夫買過一批新衫和新被過冬！洋洋即時心諗：「唔係呱，買過晒？你估我哋發咗達咩？生完BB後咪成屋都係冬天衫和被？」於是想出一個折衷辦法，就是趁外出與友人High tea時，偷偷吩咐工人為她揭床板拿衣服換季，結果可達到目的又不用與奶奶正面衝突。

個案三：多吃鹽份會生仔？多吃雪糕會生女？

Karen的丈夫很渴望有一個女兒，夫婦二人早協議只生兩名小孩，但四年前Karen已誕下一名兒子，故是次懷孕無論是男或女她已決定「收爐」，因此Karen對於腹中塊肉的性別亦特別在意，甚至會相信一些沒有科學根據的秘方，希望能提升自己的生女機會。Karen得朋友教路說一日未照到孰男孰女，就可以透過飲食來扭轉胎兒性別，於是Karen每天除了喝大量牛奶外，更日吃一桶家庭裝雪糕，希望增加生女機會。不過，Karen的如意算盤未打響前已出事，當她懷孕至十一周時便突然出血作小產，其後經醫生再三追問，她才和盤托出這個荒唐的生女秘方。

與Karen同屬一堆朋友的Daisy，因嫁了給一個傳統的台灣大男人，所以極之渴望生仔，為求可一擊即中完成任務，Daisy發現自己有喜後亦跟從這道食鹽生仔偏方，在每口食物上都灑上豉油，結果是未知陀仔或陀女，她已因攝取過量鈉質出現血壓高問題！

其實，大部分婦產科醫生都會提醒孕婦少雪糕，主要原因並唔係老人家所說怕生冷，而係擔心雪糕很易有李斯特菌，而攝取過量鹽份亦容易會引發高血壓，兩者都會增加小產風險。雖然生仔生女係天注定，但如果想盡盡人事，不如試下計日子行房等無傷大雅和無損健康的方法吧！

個案四：孕婦床上剪東西會誕下兔唇BB？

阿Kit一向篤信風水命理，被朋友貫以神婆之名。已懷有四個月身孕的她，臨睡前見腹前睡衣鈕扣想甩，於是手快快拿針到床上縫補，誰知她拿起小剪刀剪斷線條的一刻，才醒覺不可以在床上剪東西。神婆阿Kit當晚十分擔心，因她曾聽別人說懷孕五個月前的胎兒皮肉未長成，如果在床上剪東西會剪破胎兒的嘴唇，令他出現兔唇或顎裂等問題。經過了一晚煎熬後，阿Kit翌日即找有生仔經驗的朋友Diane傾訴，但卻被取笑：「你有無迷信D呀，王菲都生咗一個兔唇女，唔通佢又响床上剪嘢同縫過衫咩？我陀住BB時成日响屋企補老公補穿窿襪，結果生出嚟咪又健健康康，一D事都無！而且我屋企張梳化床都算係床，想避都避唔到，唔通我坐地下或者摺櫈咁危險咩！」

醫生話，其實遺傳原因、胎兒受藥物影響、病毒感染、內分泌失調和缺乏營養都可以令BB出現兔唇，所以只要在懷孕期間多注意飲食及健康生活仲實際，更何況宜家醫學倡明，如果真係不幸BB出現兔唇都可以出世後做手術修補，不過就預咗要費好多心力、時間和精力去應付，但係既然係自己的骨肉都要坦然面對。 

開心放鬆最緊要
老實說，香港人生活已經夠緊張，孕婦又要應付好多身體轉變的問題，壓力已經好大，所以唔應再比自己太多束縛，或者可以諗諗有無其他輕鬆的方法去應付，有需要咪即管遵守下；如果做完會耿耿於懷，成日擔心會有事的咪避忌下；如果唔小心觸犯咗禁忌都唔好終日記住，反正唔係一定有事，咪當百無禁想，話到底懷孕期內保持良好的心理質素和輕鬆面對才是最重要。