上周回顧

上星期因為打風嘅關係，休息咗成個禮拜，爽。不過日日睇電視見到好多人無電呀，水浸呀，火災呀，真係心痛。一個超級巨風就令無數嘅人無家可歸，唉，天災呢D野真係無得控制。見到火災嘅地方燒到差不多變平地，唉，好傷心啊！而subway亦因為水浸所以無得行，下城亦因為近海所以水浸咗幾條街，尋日返到office，成個下城都好靜，因為仲有D地方停電，真係超級不方便。可能大家都覺得點解整咁耐都未恢復原狀，如果係香港搞咁耐，比人鬧爆。講真，呢邊嘅subway年齡已經好舊，而整嘅時候都仲未有呢D咁嚴重嘅天災發生。試想想，地下鐵路比咸水浸過，真係有排修理。而且唔係一兩滴，係成條近海嘅鐵路都比水浸咗，我相信地鐵公司已經盡全力去修理，而我地唯一可以做嘅，就係耐心等。有時好唔明，見到有D人會為班次延誤，無車而起哄，其實大家都剛剛經歷呢個風暴，唔通就唔可以理解一下？你好彩無事，但其他無家可歸嘅人咪仲慘！不如慳番啖氣暖肚啦！見到呢D為小小事嘅人而起哄，真悲哀！

講番自己上星期係屋企點過。其實真係超忙，又要忙住執屋(因為搬屋關係），又要忙住湊女。做左幾日全職媽媽，開始時都有D唔慣，一大早起身就泵奶先，泵完就等亞B起身，換片餵奶，通常亞B早上會訓耐D，大約十點多，咁我會趁佢訓時我都訓一陣，之後佢就會叫醒我。係床上玩下抹下面仔，跟住就同亞B落廳，我食早餐，佢坐係度自己玩。到咁上下，又係食奶換片玩訓泵奶，真係幾累。雖然係咁，但都好享受，始終自己湊同人地湊唔同D，而且咁樣令我同亞B都認識大家更多，好彩亞女都痴我，見到我都會笑笑口！唔知係咪個個男人都係咁，完全唔同意佢湊B方法，亞B嗌，抱，扭眼訓，抱，喊，抱，小朋友好容易學習，佢咁做只會縱壞亞B，唔會令事情有好轉。仲有就係，眼同手依然唔會離開打機，就算睇住個女，都係一邊打機一邊睇，打完一鋪咪望下個女，之後又繼續專心打機！平時叫佢做野專注力簡直係零，一打機就變左另一個人，唉！基本上禮拜六日佢都好少照顧亞B，食奶換片多數都係我一手包辦，就算佢抱住亞B，要食奶換片都總比返我，男人真係唔可以依靠。諗下到時我媽返香港後，要人幫手仲難！唯有希望在人間，所以叫我生多個，我都要考慮下先！