731

兩年前嘅七月三十一日，係我同老公嘅重要日子，兩年後嘅七三一已經增添多一個成員。時間飛逝，轉眼間由拍拖到結婚到生B已經成十年啦，我唔記得自己有無寫過相識過程，但希望今次寫低，將來萬一有老人痴呆都可以記得，哈哈！

2002應該係我地相識，佢係我做兼職時認識，個陣大家差不多年紀，都可以打成一篇，所以無幾耐就做左朋友。其實個陣來美國只有兩年，相識嘅朋友唔多，所以出街食飯傾電話嘅人十隻手指都數哂，仲記得佢有時會打比我吹下水，所以印象都幾深刻（因為基本上我個電話係好少響），之後有陣時都會一大班人去食飯，幾開心㗎。跟住我記得個年剛剛同香港個男友散左，但已經買左機票返香港，所以個年返左香港兩星期。返來之後有一晚佢 msn 我，話有D野想同我講，我話咩事，佢話我返左香港個兩星期好掛住我，開頭我以為佢玩野，但之後佢好認真咁問我可唔可以做佢女朋友，我先知原來係真，不過個陣，我對佢無感覺，因為一直都係當朋友，不過我話我會認真考慮，其實只不過想大家有位落台，之後我都無再諗。跟住有晚佢打比我，問我可唔可以去我屋企拎手信（我仲記得佢個陣叫我係香港幫佢買三國演義DVD), 其實個陣已經夜，不過佢話佢好心急，咁我就是但啦。佢黎到已經好夜，個陣自己一個人住，所以無所謂，佢山長水遠來到其實就係想見我一面，手信只不過係籍口，跟住佢問我食左野未，我話未（個陣岩岩係香港返，有D唔開心，無心情食野），佢就二話不說去廚房整左個公仔麵我食，個刻都覺得好warm, 雖然只是一碗公仔麵，但背後嘅心思令我有D感動。不過其實個陣都未開始，我都仲未準備好，但我又覺得佢係咁多個男友之中，係真真正正關心我，又會肯煮野比我食（雖然係唯一一次，哈哈），所以到最後我都比左個機會佢。開始時真係好大磨刷，我以前都幾任性，覺得拍拖就一定成日痴埋一齊，分開兩秒都唔得，所以好多時佢去打波又或者做野我都會發脾氣，（係，我認我係有小姐脾氣）無理取鬧係我嘅嗜好，哈哈，好幾次都差D
分開，不過又唔想放棄。到而家，磨刷一定有，大家嘅背景唔同，所以思想上有好大分別。因為佢自細無人照顧，思想上係比我成熟，而我自細溫室小花，天南地北兩個唔同世界嘅人走埋一齊，緣分真係好奇妙！雖然我成日都投訴佢，又成日數佢嘅缺點，但我內心知道佢係一個誠實嘅人，一個可以比我依頼一世，對我不離不棄嘅人，我仲可以點？佢並唔富裕，但我覺得佢心靈上好富裕。如果我有難題，佢會幫我解決，我唔係指換燈泡呢D，係好似關於工作上，家庭上，佢有一套獨特見解係我想不到，我會引佢為傲！

呢篇野雖然無機會比老公見到，但我好多謝你咁多年對我嘅容忍，接受我嘅短處，希望我地每天都恩恩愛愛咁過！