戒夜奶

Hannah出世時，每晚凌晨3點左右便要餵夜奶，當然我明白作為初生嬰兒，呢個過程係必然，而我嗰陣每晚都會守候等佢醒，我通常係Hannah 開始忟嘅時候開定奶，就會叫佢起身餵奶，之後有一晚4點鐘左右佢開始忟，我搖一搖佢佢又瞓番，咁我又唔想訓番，因為訓下醒下嘅感覺仲辛苦，所以決定一路上網一路等，點知個晩就由天未光等到天光，Hannah 成六點多先醒，真係玩野！不過都好，起碼我知佢係可以訓練嘅，而我個日就超眼訓。

到大慨上星期左右，某晚佢連叫都無叫，一覺訓天光，七點多餵一安士諗住佢會好快醒，點知搖搖下我同佢訓到成十一點幾，嚇親我，一向女兒食量驚人，一食少D就會忟，點諗到突然間成晚無食奶佢都捱到先得㗎！之後同老公亞媽講番，佢話係正常，因為BB開始分日夜，所以可以開始戒夜奶。其實我又唔係嫌辛苦要餵，不過如果而家唔戒，到開始返工時就會好辛苦，好彩嘅餵一餐半個鐘，唔好彩有時兩個鐘都有試過，因Hannah 有時中意嘆奶，可以分開幾安士幾次食，你又吹佢唔脹！所以而家係時候要訓練佢啦！個計劃就係每晚九點多D幫佢沖涼，十點幾就餵少少奶，之後同佢玩下傾下計，到十一點半就開始餵最尾個程奶，上網睇原來最尾程奶可以餵多少少，等BB可以訓耐D。當然，要實行真係唔易，因為要配合Hannah 需要並唔係咁容易，首先，佢好為食，有時食完之後見佢lam lam脷又以為佢要食，不過未夠3個鐘我又唔可以再餵奶，所以要比水佢飲，有時佢訓唔著又會忟，要人抱，每日嘅routine就係等餵奶，掃風，換片，等佢訓覺，每隔3小時一次，有時如果飲人奶會更密，2小時一次都有，可惜自己唔多奶水，而佢又吃得多（有時5安士人奶一次食哂），所以每日都會混合罐裝奶水食，而佢好肚餓時唔理三七二十一，喊到晤收聲，直到個奶咀入口就即刻啜，收哂聲，真係好鬼dramatic!

Hannah 好醒訓，有時行過有聲都會醒，但無可能要求個個人咩都唔做等佢起身，所以另一樣要做嘅就係訓練佢係嘈嘅地方都可以訓，仲要比佢知早上同夜晚嘅分別。決定早上時間開下電視音樂，比佢知道係早上，而到訓覺時就超靜，咁大分別應該可以適應到。

搞笑嘅係，琴晚本來可以嘗試呢個計劃，同老公之前傾完，九點幾幫佢沖涼，十點多餵少少奶，點知老公又突然轉plan, 話小朋友係應該早D訓，同我講到我地返工時就無咁辛苦，比佢吹脹，個程餵左半人奶同奶水，成5安士，唉！我發覺男人真係唔多聽人講野！其實我明白小朋友當然要早訓啦，個問題係，Hannah 只不過係幾星期人仔，你想佢由十點幾捱到第二朝？no way! 佢講嘅小朋友相信起碼一歳多先可以做到，所以，十點幾訓完，到一點到我又要餵多次奶。我唔想Hannah 成點都未訓，有時tum佢訓都唔容易。之前講過佢好醒訓，有時抱住佢訓左，放上床時又醒，真係幾頭痛，呢個過程可以維持到成兩個鐘，琴晚我唔理三七二十一，放佢上床息哂燈，咁佢見無燈叫左幾下就訓左。

呢排可能抱得多，而BB又開始重磅，隻手開始酸痛，唉！都唔知可以抱到幾耐？而家就話重，到過多一排再重D我相信已經唔可以再抱嘞！不過當然寧願佢長肉都好過食極都唔生肉啦！希望隻手生性會快D好番！