倒數兩星期

不知不覺原來仲有兩個多星期就飛啦，心情好緊張又興奮，不過都覺得臨飛前都有好多野忙呀，工作上又要交代比其他人，而d小朋友又要顧佢地，又要諗下帶咩，真係做人亞媽，想唔有情緒病都唔得呀，成日擔心呢樣個樣。  雖然今次回港大部分時間都要湊女，但我覺得可以去下旅行已經對我來講開心好多， 雖然呢排心情都係麻麻，都成日諗好多negative野，但好彩對住佢地兩個都唔算crazy,  係有時佢地癲起上黎會令我覺得透唔到氣咁，但比起以前，真係好多了。  希望亞媽會幫手睇下，我可以自己去做下自己野啦！

前個排同老公講話我有情緒病，佢既第一個反應係，我又唔係醫生我唔知點比意見你，不如你去睇醫生啦！有時不得不比男人吹脹，我同佢講，只不過係想佢開解下我，傾下，鬼唔知佢唔係醫生咩！不過佢地總係咁，有咩事就以為我要佢解決，其實一句問候已經可以令我舒服多了。 之後個晚，佢話腳痛，我就用番同一個道理，話，我又唔係醫生，我唔知，你去睇醫生啦！ 哈哈，兩個就之後大笑！  一句關心，對我地呢d couple來講，好似好難再出口咁，但原來如果有人肯開聲先，又真係唔難既。 

呢幾晚hannah姐又發癲， 晚晚又半夜三更醒跟住喊，呢個stage會去到邊先會完呀？ 無覺好訓真係幾攞命。  跟住今日打去學校問，佢地又話無咩野，係呢排比較易發脾氣，不過普通自理能力都ok,  不過係學校一個樣，屋企另一個樣， 係屋企，叫佢clean up,  當我唱歌，叫佢做邊d野，完全唔理， 唉， 以為會易d, 點知一樣咁難， 同埋好多野佢係學校做到，係屋企都唔會做，真係無辦法， 唯一一樣係，佢話佢係班上d學野好叻，咁算唔算係有dd好處呢？  有時叫佢地做野，簡直就係打仗咁，好個日就自動自覺，唔好個日就采我都傻，要小朋友聽教聽話實在不容易。