人奶媽媽

其實一開始既時候，係真係想餵全人奶，不過係醫院時，真係好鬼累，又痛，好想休息一下，所以第一晚係醫院時，比左亞B去nursing station, 而我就休息。第二日既時候，我就同姑娘講我想BB夜晚同我留係房，我就係第一次同亞B有近距離接觸。 開始時好緊張，因為第一次接觸一個好似麵粉團既野，好擔心會整親，而且又輕又好似好脆弱咁，所以一舉一動都好驚，不過頭一晚想試餵人奶，但亞B又好似因為我吾夠奶所以係咁喊，我唯有放棄，比佢食奶水，我知道餵人奶要堅持，不過無理由亞B係咁喊都吾餵佢啫，所以個陣就開始擔心自己係咪無奶呢？ 返左屋企後，都有試餵，不過都好似無進展。 D人話飲木瓜湯會谷奶，講真，真係吾多覺。  到亞B一個月後，自己可能食野又比較上多左，休息又多左，所以奶水又多番D。 到而家，經過三個多月既經驗，吾知點解BB係我nurse係食吾飽，所以我就開始泵奶。 講真，有時真係好煩，因為我而家日日要泵4次，返工前同臨訓前，返工時間要泵一次，放工第一時間又係泵，唉，好似做左個泵奶媽媽咁，有時晚上好眼訓時真係難頂，今朝打算早D起身，點知比平時仲遲，搞到一路泵一路化妝，而家仲要日日帶住個泵返工，唉！最慘都吾係返工，係出街！有時出街，都要就岩時間，如果太長時間谷奶谷得太耐，漏之餘仲會超痛，但又無可能次次出街都帶埋個泵出去，唉，超級吾方便，所以出親街都會係屋企附近，費事煩。

都係個句，做媽媽真係吾易！