2月雜炒

實實在在太忙啦，工作上真係無停手，一停就又有野due,  原來唔寫一下就已經3月份，時間真係飛咁過呀。  咁睇住兩隻嘩鬼又真係幾快過，個個weekend都快到一閃即逝咁。  本來上星期想出下街，但可惜我地無拿拿又作感冒，流哂鼻咁，都係休息下好d.   呢d天氣，真係著多件又熱，著少件又凍，係咪真係玩c人呢！！！

今次來個雜炒，睇下佢地呢排做過d咩啦。 

Belated新年快樂，祝大家有個健康快樂既猴年。 

新年個幾日我parents來探我，我就抽左幾日去陪佢地，不過佢地來得10 日都無，真係快閃黨咁，佢地返左hk我都唔覺，完全無感覺，陰公！不過就因為佢地來我先有機會做自己野，好似weekend要去整d野，佢都可以幫手睇一陣。 

我地之後更完成左佢地兩個人張床，都係因為佢地係度，有個人幫下手，先可以整得掂咋。  

雖然間房未算係執好哂，但起碼都訓到， 你話佢地兩個share間房訓唔訓到，基本上訓得著，但因為hannah姐訓得本身十分差，到12am左右就喊， 咁一個喊另一個又無可能訓到，所以個幾日真係好鬼攰。  所以呢排我地又同番hannah姐訓， 唉，算啦， 有時真係寧願有覺好訓算數。 anyway,  呢個都算係大工程，我同老公整左成日架啦，條腰痛到呢。。。。。

Hannah第一個award,  哈哈

我覺得好搞笑，雖然唔知真係點幫手，但起碼都有幫人既心，都係一件好事。 不知不覺今年就4歲，呢個人仔咁快又大一年，真係時間不留人呢。 不過見到佢同亞妹健康長大，做媽媽既就真係安樂哂。 

今年emma都要開始返學啦，媽媽希望佢聽老師話，唔好咁曳曳豬就好啦！(係屋企係小霸王，夾住我地打架！！！)

情人節

Happy Valentine's day! 

因為父母來既關係，我地情人節正日就陪佢地兩老，而都係因為佢地來，我同老公先可以有一晚可以自己撐枱腳，嘻嘻，真係好開心呀！ 雖然真係一年都係得一次，但我同老公都好enjoy呀！ 個晚老公安排左去一間日本餐廳，今次有D吾同既，係因為我地係食omakase， 即係所有都係廚房安排，對於我有選擇困難既人，又真係幾方便，哈哈！ 雖然個晚天氣嚴寒，但有老公陪我度過第14個年頭既情人節，真係暖在心頭呀！  其實佢地有介紹D食物係咩，不過我都聽得吾清楚，總之就係好味啦，哈哈！ 多謝老公送呢個大餐比我，雖然無花無card收，但呢餐咁鬼貴，算數啦，嘻嘻！



其實睇相，就知佢地用名貴食材，好似有魚子醬，有金薄，有燕窩，有和牛,有海膽...... 雖然貴，但真係好味呀，不過真係未必有下次呀！

你地又估下呢餐幾錢？ （估中無獎，哈哈！）

人生第一次

又消失左一段日子啦，真係忙到無咩心機去寫blog,  返工 suppose 好得閒架嘛，但而家真係無時停呀！ 而呢兩個星期做左人生既第一次， 就係第一次做陪審團。  來左美國一段日子，之前都有去過，但都係等，無選中我，但今次真係抽左好多人，所以我都無得走雞。  其實呢段時間， office 咁忙，係應該postpone 做， 但我同我老細講，佢地又無反應咁，咁我就做啦。 未做之前，我既impression 係可能會早走，同可能會好快完單 case,  但原來我所做既 grand jury,  同trial jury 係唔同， 係有好多唔同既case 你聽，之後你聽下d evidence 夠唔夠 charge 個個suspect,  如果夠既，就可以上 trial,  唔夠，我地就dismiss.    不過做左差不多兩星期，10 單有9 單都會上到 trial,  因為d evidence 實在太 obvious 啦。做左兩個星期， 覺得呢個世界好多人都會為左小小事而犯罪， 其中有d 真係好搞笑， 不過一樣米養百樣人， 實有d 人係怪怪地既。唔好以為做jury 好舒服， 我開頭以為都係hea 過，同可以早走，我記得第一日，我地聽case 聽到成7 點， 我返到屋企時已經差不多8 點，我99 仲以為我去左邊， 我邊有諗過會咁遲先得架，總覺得政府野，應該會好準時咁走，哈哈， 所以頭一星期，真係好難過， 日日都咁鬼遲走，咁夜返到去仲已經好攰，又要拿拿臨食野，又要幫佢地沖涼，我好多時都未沖涼就昏迷左，真係忙過返工呀，不過都總好過係court house 入面hea 過， 仲難頂呀！今個星期已經last week,  不過我覺得今次係一個幾好既experience,  接觸到好多唔同case,  聽過幾多人testify,  原來犯罪好難， 呢個世界好多camera,  真係做咩都有人睇到，哈哈。 你話啦，睇得咁清楚，又點可能唔入罪呢？

G&T班

呢邊讀書制度唔同香港，免費讀書係由4歲開始， 如果返preschool,  就要自己比錢。 Hannah係兩歲半左右就去左 preschool, 個個月比$950 usd,  其實都幾拿利，但佢返學後又真係覺得佢學多左好多野，所以都值得既。 下年既佢就可以入免費讀書program,   不過其實學校已經講到明，佢地個syllabus係玩，無學野成份，唉，難怪d朋友講，5歲讀kindergarden時，都係學番abc先， 怕其他小朋友咩都唔識(未讀過書個d),  因為5歲前個d都唔算係mandatory,  你可以選擇唔讀架。   我見Hannah學野都算ok,  同埋我晚晚都會比下功課佢做(係自己print d worksheet比佢),  咁所有就決定同佢去讀G&T class.   G&T stand for gifted and talented,  中文翻譯為天才班， 其實都唔算係咩天才，只不過其他class d進度實在慢，所以就膽粗粗睇下hannah讀成點。 如果要考入天才班，2017 年1 月就要考，仲有一年左右，我相信都夠時間卦。 其實佢地個outline,  睇落去都唔易架， 不過如果考唔到我又唔會失望既，只要個女盡左力，我覺得已經好滿足。   hannah學校入面有個G&t early prep,  咁我又見咁方便，唔駛接完佢去第二度再送佢去第二度學野， 咁都ok呀，同埋佢本身就係學校入面， 只不過一個星期一日會留耐少少，咁都ok啦。 價錢方面都reasonable,  $600 20 星期， 呢邊d價係咁上下呀。 

呢排真係比學校榨乾左，12月個陣又話上 summer class要比錢先， 個度又$1850 (兩個月),  跟住個個月又$950, 而家上天才班又$600, 跟住又要報定下年hannah讀書 enrichment (下年本身係免費，但鐘數去到 3點左右，所以如果想個小朋友留到5 點，又要一個月$360, 佢仲要唔比個個月比錢，一比就要成年， 即係$3600, 呀，真係攞命呀！),  跟住又要準備emma下年9月入學，個度又$980, 唉， 難怪養一個小朋友要用4百萬啦。雖然呢d錢點都唔貴得個讀大學，但我個個月咁嘔出來，真係癲左呀，仲有今年要返hk,  洗費又點少得呢，唉， 我都係日日食麵包做lunch算啦。  我仲未計wkend諗住同佢去學跳舞，而家咁，我都要考慮下先啦，唉。

聖誕快樂！

懶到出汁既我，聖誕節前居然無點再寫blog, 真係懶人一個！而剛過既聖誕節都無任何特別，同係一家4口開開心心咁過，嘻嘻。  星期6就去左朋友家生日會，兩個都好well behave, 我都算係有安樂茶飯食下，哈哈！ 雖然遲左少少，不過都希望大家有個開心既聖誕，同新一年大家健康快樂呀！

朋友個女兩歲生日，我地就去join佢地既生日party. 好開心呀，除左佢地兩個，我仲見到我個好朋友，嘻嘻，開心到暈！

呢D相，見證住佢地一齊長大，真係要好好珍惜呀！

第一次家長會

以前讀書時，我無咩印象有家長會呢樣野，成績表就有，同埋如果成績真係差，就要見家長。  今次係我第一次作為家長去既家長會，都係一個幾特別既experience,  同埋了解下hannah 係學校讀成咁。 雖然去接去送都會見到老師，但我地返工既，多數都係由6299 去接送，同埋就算我去接送，都唔會好多時間講到野，因為好趕。  

早幾日已經有個evaluation,  其實我對佢學習上又唔太緊張，反正我知佢都學習緊，無咁大concern,  反而係， 佢係學校度有無同人相處有問題， 有無manner 個d 野重要d.   早幾日 evaluation,  果然academic 個d 唔太大問題，中英文對答如流，反而老師既comment 係佢既emotion 要work on it,  個下又真係幾難教。 生女又點會唔知女心肝， 佢係屋企脾氣臭係出哂名， 我係估唔到係學校時都會咁嚴重。 應該咁講，佢係一個好有routine 既人，你唔可以搞佢既野， 佢放係度既野就一定要放到90 度，如果你放錯左佢就會發脾氣， 算唔算係强迫症一種呢？ 跟住，老師又話佢要做既野就一定要做到， 唔比佢佢就會發脾氣，不過老師都知佢脾性，起碼都唔會就住佢，佢發脾氣就由佢發陣，佢有時都會自己發完癲就唔發，有少少進步好過無啦。 其實個個小朋友都有難教既point,  希望大個會好d 啦。  今日去到，有個教music 既老師，同佢傾左一陣，真係比到d inspiration 我教hannah 學琴， 其實自己耐性唔係好，我知架，但佢教我用fun way 去教佢學琴，佢地年紀既小朋友，吸收力絕對勁過我地呀， 雖然唔係想做咩虎媽，但有時見佢wkend 係屋企hea 來hea 去，不如去學下野仲好啦。  6月會再有一個家長會，到時hannah 已經4歲，希望會有大進步啦！

預祝聖誕節快樂

好耐無蒲頭啦，真係懶到出汁，不過聖誕節來臨所以有好多準備，真係頭都大哂呀！

不過最最最最最開心係，我下年終於可以完成我個心願，一家大細返去香港一轉，yeah! 上幾個星期，見返香港機票平，就即係同老公講，跟住佢話真係好平，同埋吾想我再失望，決定返去一次。雖然，吾係話留好長時間，但見到屋企人幾面，我已經好開心了。  希望到時有機會約哂所有blog友仔見啦！

太耐無update, post下D女既相比大家睇下先啦 

佢既至愛，yogurt, 不過佢pronounce得好差，yo耶yo耶咁

兩姐妹有新鞋穿，開心到暈呀，哈哈

聖誕樹，比小朋友見到前係咁

見到之後，所有禮物以為係自己，要拆，我就即刻收起，嚇得我。而個D波波......全部要向上移，佢地瘋狂得恐怖呀！