聖誕快樂！

懶到出汁既我，聖誕節前居然無點再寫blog, 真係懶人一個！而剛過既聖誕節都無任何特別，同係一家4口開開心心咁過，嘻嘻。  星期6就去左朋友家生日會，兩個都好well behave, 我都算係有安樂茶飯食下，哈哈！ 雖然遲左少少，不過都希望大家有個開心既聖誕，同新一年大家健康快樂呀！

朋友個女兩歲生日，我地就去join佢地既生日party. 好開心呀，除左佢地兩個，我仲見到我個好朋友，嘻嘻，開心到暈！

呢D相，見證住佢地一齊長大，真係要好好珍惜呀！

第一次家長會

以前讀書時，我無咩印象有家長會呢樣野，成績表就有，同埋如果成績真係差，就要見家長。  今次係我第一次作為家長去既家長會，都係一個幾特別既experience,  同埋了解下hannah 係學校讀成咁。 雖然去接去送都會見到老師，但我地返工既，多數都係由6299 去接送，同埋就算我去接送，都唔會好多時間講到野，因為好趕。  

早幾日已經有個evaluation,  其實我對佢學習上又唔太緊張，反正我知佢都學習緊，無咁大concern,  反而係， 佢係學校度有無同人相處有問題， 有無manner 個d 野重要d.   早幾日 evaluation,  果然academic 個d 唔太大問題，中英文對答如流，反而老師既comment 係佢既emotion 要work on it,  個下又真係幾難教。 生女又點會唔知女心肝， 佢係屋企脾氣臭係出哂名， 我係估唔到係學校時都會咁嚴重。 應該咁講，佢係一個好有routine 既人，你唔可以搞佢既野， 佢放係度既野就一定要放到90 度，如果你放錯左佢就會發脾氣， 算唔算係强迫症一種呢？ 跟住，老師又話佢要做既野就一定要做到， 唔比佢佢就會發脾氣，不過老師都知佢脾性，起碼都唔會就住佢，佢發脾氣就由佢發陣，佢有時都會自己發完癲就唔發，有少少進步好過無啦。 其實個個小朋友都有難教既point,  希望大個會好d 啦。  今日去到，有個教music 既老師，同佢傾左一陣，真係比到d inspiration 我教hannah 學琴， 其實自己耐性唔係好，我知架，但佢教我用fun way 去教佢學琴，佢地年紀既小朋友，吸收力絕對勁過我地呀， 雖然唔係想做咩虎媽，但有時見佢wkend 係屋企hea 來hea 去，不如去學下野仲好啦。  6月會再有一個家長會，到時hannah 已經4歲，希望會有大進步啦！

預祝聖誕節快樂

好耐無蒲頭啦，真係懶到出汁，不過聖誕節來臨所以有好多準備，真係頭都大哂呀！

不過最最最最最開心係，我下年終於可以完成我個心願，一家大細返去香港一轉，yeah! 上幾個星期，見返香港機票平，就即係同老公講，跟住佢話真係好平，同埋吾想我再失望，決定返去一次。雖然，吾係話留好長時間，但見到屋企人幾面，我已經好開心了。  希望到時有機會約哂所有blog友仔見啦！

太耐無update, post下D女既相比大家睇下先啦 

佢既至愛，yogurt, 不過佢pronounce得好差，yo耶yo耶咁

兩姐妹有新鞋穿，開心到暈呀，哈哈

聖誕樹，比小朋友見到前係咁

見到之後，所有禮物以為係自己，要拆，我就即刻收起，嚇得我。而個D波波......全部要向上移，佢地瘋狂得恐怖呀！

生日快樂 Emma B

話咁快就兩歲啦，真係時間點樣過架？ 媽媽祝你健健康康，做個開心快活人呀！ 雖然始終係兩歲前未能同你搭轉飛機（因為兩歲前係免費），但希望新一年有機會一家人去玩啦！  

今年都有搞生日會，不過其實真係一個少少gathering, 係完全無人幫手之下（係，連老公都吾肯幫，哼！）我已經吾係好想再郁，所以都係叫左少少人，有幾個小朋友一齊玩下就算，而大人就自己hotpot, 哈哈，好懶呀我！ 不過清潔買野我真係一手包辦，拎到我手都軟，個日又超大風，我整完個汽球後，真係幾驚會飛走呀，多謝老公一D都吾肯幫手！ 

雖然吾係有好多節目，但好多謝朋友來臨一齊慶祝emma BB既生日呀！ 

生日大快樂emma BB! 

呢張emma BB好有大家姐feel, 哈哈哈！不過其實難度都高，因為佢地坐左起碼有成分鐘比我地影，哈哈哈

emma至愛， peppa pig!!!!!!!

班小朋友話，影完未呀，好想食蛋糕呀，哈哈哈！

再一次多謝朋友來臨同所有朋友送既禮物， 多謝大家愛錫emma bb呀！
 

Halloween 2015

一年一度既halloween又過左啦，呢個咁好玩既日子，小朋友就最開心。 好耐之前朋友送左套elsa裙比Hannah， 咁本身佢又咁中意，所以我就比Hannah去做Elsa啦，而本來我都無諗住買比Emma架，因為屋企已經有套比佢著，但我見家姐做elsa, 亞妹點可以吾做anna, 所以佢地今年個theme就係frozen啦，哈哈！ 

雖然爸爸絕對吾想個女做公主，但我覺得，如果佢中意扮又無咩所謂啦，加上，佢扮，又吾係學有公主病，吾駛咁在意je...所以比我說服左，yeah! 亞女，你可以得償所願啦！ 

佢地學校星期五有個halloween party, 大家都扮得好得意呀！我就個日去左佢地學校接亞女放學，見到佢D同學仔個個都扮得好有趣，我相信佢地個日一定玩得好開心呀。 好彩既係，hannah吾中意食甜野，會比佢試下但佢多數食兩啖就吾中意食。 其實我都擔心成筒糖，如果佢死lur要食，我都吾知點算。 最搞笑係，我朋友買左個kinder出奇蛋比佢，佢拆開哂後，拎左個玩具出來，個朱古力就比番我，哈哈，小朋友吾係應該幾中意食朱古力咩？  

之後個日，我地就一齊去條街上trick or treat, 嘩，條街多人到........不過吾知係我地遲定點，好多鋪已經話out of candy, 真係捕興，我見其他人有成個bucket咁多糖，我地...嘻嘻，不過我地都至在參與，有無糖其實都無所謂呀！本來可以recycle, 但個晚可能我地出左去食飯，跟本就無人拎糖呀，而家個bucket糖....都吾知點算好！ 

個日幫佢試衫，開心到佢....哈哈哈！

佢地班既小朋友呀，個個都好可愛呀！

之前佢地學校都有pumpkin patch, 個個都拎左個南瓜功課返屋企

hannah好朋友仔

影兩個既正面相難到無朋友.......呢張真係算好比面，哈哈

都依然好似個男仔，希望大D會似女仔多D啦

好嬲呀！

呢幾日工作都好忙呀，未有好多時間update.   家庭上，我又有d唔開心，點解？ 因為我愈來愈唔中意樓下個女，佢d態度好差。  好似琴晚咁，hannah跟佢入房，唔知咩事 hannah喊，咁問0靚妹，又話無push佢， 問題係，佢亞媽係房，完全唔覺得自己個女做錯，仲扮作約無其事，我個下真係好嬲！ 我明白hannah係學校或者都會比人push,  比人蝦，但個個係自己所謂屋企人，都真係唔明點樣教佢。  之後，hannah坐底食飯， 佢就話hannah偷左佢隻叉，跟住我真係好興， 咩野係偷？ 個叉唔係佢一個獨有，不過我無發火，始終人地老味係度，教女呢個責任就比番人地啦，真係關我蛋治咩。  呢d咁既人，唔好話朋友，家人都未必頂得順，做老味既完全唔管教小朋友，有爺生無乸教就係呢d.   仲有，有次仲頂撞99, 雖然99 都好開心比人頂(白痴架！)如果個個係我個女，我一定唔比發生。  

之後同同事傾番(佢d仔女都已經係成年人), 佢話呢d情況，講就係衰人，同埋個個唔係自己個niece, 唔到我去管。 加上，我都覺得呢個係一個好好既反面教材， 我應該多謝佢做呢個咁好既example話比我d女知，唔應該咁做呀，哈哈！ 其實真係好在意自己點教好自己 d子女， 去到學校，我未必知道佢地發生咩事，而家有個咁好既怪獸比自己個女睇，應該都係好事既。 以後 hannah想同佢玩，佢唔想，我就要教 hannah佢唔想同你玩既時候就行開，佢有佢自己既野玩，未必岩你玩架。 雖然佢d態度真係奇差，但我應該抱住教女既態度，唔駛嬲唔駛嬲呀(雖然我琴晚都嬲到震，哈哈哈！！！)

新玩意

早一陣子，已經係度諗，我有兩個女，不如買個廚房比佢地啦，其實已經睇左一排，但見D價錢都吾係咁如意，咁就打算等下啦，或者等到假期時候會再平D，點知有一晚，上網睇到有個廚房，個價係比平時既半價，我真係再忍吾到手啦！ 其實我而家shopping, 都係放係佢地身上多，自己，有時著到成個乞衣咁，我都少理會了，哈哈！ 講番個廚房，真係好抵，連埋稅，都係大約＄55左右，平時呢個廚房已經要過百呀，我一見到，就同老公講，嘩，咁平，一定要買呀，就叫佢睇住D女，我即刻上網落order, 買完真係好實在呀，因為我開頭驚會好快咁out of stock, 我往往都買吾到平野！ 好彩買得快，好世界！！ 

到收到個日，都好興奮呀，不過因為要assemble, 所以我地都等到weekend先做啦！ 不過到weekend, 佢地又係度，真係好難整到，老公整左一半之後就放棄左，佢地實在太幫得手呀！ 我地就係晚上佢地訓左後趕工，嘩，原來整整下，整左成兩個鐘，真係攞命呀，整完後條腰真係酸左，因為要坐係度鑽下睇下彎下，我同老公真係嘔心瀝血呀！ 希望佢地會keep住玩，如果吾係真係哂心機呀！ 

Hannah & Emma, 呢個就係你地聖誕禮物，吾好話我無買野比你地啦！

2015 pumpkin patch

呢排真係好懶散，寫blog變得可有可無，或者呢排成日上網買野，shopping點都緊要過其他野既，嘻嘻（始終都係一個女人，買野真係會到忘我境界！）

上星期去左一年一度既pumpkin patch, 一如以往，都係好多人，不過個日天氣好好呀，吾駛著到包糉咁，感恩！ 其實要揸成個鐘頭車先去到，感覺上有D吾抵，因為除左係影下相之外，真係無咩好做，不過陪住兩個有講有笑就開心啦！ 至慘係揸車個位，回程時無得覺覺，我地就訓到豬仔一樣，無計啦！ 老公，你就犧牲一下啦，哈哈哈！ 

兩隻小鬼見到咁多個南瓜，真係好興奮呀，係咁擺來擺去，好得意。 雖然玩左一陣後就已經開始悶，但起碼影到D相，大個比佢地睇番都可以話我地去過呀！ 其實因為路程遠，我地行左陣食D野，返到屋企都已經成4點了（我地已經一早就出門！） 湊住佢地，真係少D精力都吾得，我地兩個長期2打2,都咪話吾辛苦。  呢排我老公晚晚OT， 我湊佢地食飯真係人都癲，加上有99係隔離ee哦哦，好多時我都吾想食算數。 唉，成日同自己講，幾年啦，幾年後會好好多，希望我真係捱到幾年啦！

帶左爸爸大機，影D相出來真係吾同D，嘻嘻！

想玩飄浮相？ 哈哈，跳吾起呀！！！！！ 

1

2

3

下，跳左啦？ 下次努力D啦...... 

走失記x2

真係好吾明，一向hannah小姐都比較痴身，以為出到去，佢吾會點走開，點知.....

上星期六，因為想買張枱比佢地寫下字，所以去左ikea, 本來一開始都好開心架，有新野買wor, 緊興奮D，咁hannah話想行行，咁就放佢出來啦，一開始佢都跟住我地，雖然都會吾合作，但我地話byebye佢都會跟住，之後我就推妹妹行前先，佢就同爸爸一齊行後，係前面等左佢地一陣，都無影，咁我地就去番搵佢兩個啦，老遠見爸爸打緊電話，佢見到我，問hannah呢？ 跟住我話我點知，你吾係同佢一齊既咩，個刻真係驚到心臟停頓，ikea話大吾大，話細吾細，有櫃有床，一個小朋友咁細，真係好難留意，個刻我真係驚左，始終佢咁細個，你點知有無D變態人係身邊，佢吾見左佢吾識返屋企架，真係嚇到鼻哥窿無肉，我又吾係好明，佢點會掛住睇野而睇吾實個女，不過男人都係咁，可以點？  之後佢就去番原路搵佢，我就向前行，不過我其實都坐左係個度等佢，所以如果hannah經過，我又無理由見吾到既。  之後我去番搵佢地，有個女人好心問我係咪搵個細路女，我話係呀，佢話你先生已經搵到佢，吾好擔心，我即刻沖去搵佢地，hannah已經喊哂口，我就驚到都喊埋一份，試想下，吾見左個女，真係吾怪得人，所以出去真係真係真係要拖實佢地，就算幾吾中意都好，都一定要睇實。  之後我問番我老公，佢話hannah掛住玩D drawer, 所以吾知去左邊，搵到佢時，佢係比人帶去ikea 個D職員到，好彩有個講廣東話既人幫佢，如果吾係都吾知點算。 唉，我地之後都心臟停頓左一排，比佢咁嚇一嚇，真係心血少都暈左， 其實本來有好多野想買，但比佢搞完後，都已經無心情了。 我諗我而家係應該買個GPS比佢掛係身，就算真係真係再走失，我都有機會搵到佢（當然希望吾好再發生啦！）  

Emma BB @ 22 months

好耐都無update下亞妹啦，原來仲有兩個月左右就2歲，嘩，D時間去左邊呀？？ 我真係完完全全想像吾到佢已經由條蟲仔到而家可以自力更生幫手clean up, 食野，痾peepee, 雖然偶然都要幫下手，但如果你叫到佢，佢都一定會做到。 吾知係咪頭一個硬係會縱壞多D，以前hannah總要我地頭都痛，而亞妹雖然都會係曳曳，但都不足為患。 希望佢今個冬天吾會好似上年咁病病病病病啦！！！！！！

妹妹係一個愛笑既小朋友，做咩都好，好易笑，所以都感染到我地成日笑呀。

中秋節無月餅食，食yogurt一樣咁開心！

今年既中秋有lunar eclipse, 我咁大個都未見過，真係好好好特別呀！

媽媽手痕，幫亞妹搞成咁，佢真係多得我吾少，哈哈

一路都知道妹妹係比較頑皮個個，好多野佢敢做而姐姐都吾會做.....今次又吾知搞咩自己stuck左係入面，出吾到，喊哂口叫救命，變態媽媽就係拯救前影低D曳野先，嘻嘻 

生日勁不快樂

又大一歲啦，雖然人老左對過生日要求真係低左，但我諗小小野都要做卦。 話就話年年生日想dayoff,  但因為今日有野due加上我地prepare左個 surprise party比我同事 50th歲生日，所以我都無咩所謂呀。其實全日我都好開心架，到放工個陣， 原本老公講5 點幾走，點知突然又話有d野煩，要遲d先走得，我都已經唔係咁開心。 係，有時d野未必佢控制到，我都唔應該怪佢，雖然佢返到屋企都係咁過，但見到佢我諗我會開心d.  之後，佢成差不多8 點先返到，唉，個心已經涼左一半。 咁算啦，佢都係做野，無得講。 返到屋企，又要湊女沖涼睇書訓覺，都已經無時間做自己野，到d女訓哂，都已經成 10 點有多，我沖完涼出來，我老公問我有咩做，我話無呀，跟住佢話，咁慘，無電視睇？ 跟住我話唔係。。。。 跟住就再無理我，自己做自己野。 比著平日，我無咩所謂，因為大家忙左一日，都想休息下，佢中意打機我就睇下電視咁，但我生日既時候，就真係感覺怪怪的。 佢就真係自己打機，打到我吹哂頭，刷完牙，跟住先問我有咩做，我話無，其實個刻條氣已經谷住左，我生日已經過左成日，仲有一個鐘頭既時間渡過，你先問我咩事，我個陣其實都唔多數理佢，我唔想係生日個日咁唔開心，我自己入左房，佢feel到有d野，佢就打完機入來問我咩事，我本來都唔想講，我唔想大家又不歡而散，但佢問多兩問我就講我唔開心，生日無人陪，跟住佢答案係，我琴晚咪陪左你囉，同埋呢幾晚都陪你呀，佢話唔知點樣先滿足到我。 我真係唔想講野，咩叫生日？ 呢幾晚陪我就係生日個日唔需要陪，我諗呢個都係男人既想法。  跟住仲話我唔好咁emotion,  話我唔應該咁易影響到自己情緒。佢咁講法， 原來唔開心，都唔可以喊，都唔可以比人知，更加唔可以用情緒來控制自己，咁我覺得自己生存無咩意義，我本身就係一個愛喊既人，睇套戲感動都可以喊一餐，而家連生日無人陪唔開心都唔可以喊，咁我都唔知生存有咩意義了。

多謝你地聆聽，都多謝你地既blessings. 吾知呢條路可以點行，但為左小朋友，都要照行。

High tea @ The Pierre

未寫完之前既ftm生涯前，我想中途加入另一篇野。 再吾寫，我就吾記得架啦。 自從生完小朋友後，真係未試過自己出去好耐，最多係試過約朋友係office附近食lunch， 又或者朋友同埋小朋友一齊去食野行街，但兩個亞媽出去，真係未試過呀。  今次， 得到屋企所有人批准，就來一日辣媽high tea日，同我既朋友二人一齊去central park附近high tea.  講真，自己從來都未試過high tea, 就算係HK，都未試過呀。 所以今次真係新穎過新穎呀，咁當然係超級開心啦，難得吾駛湊小朋友可以休息一日，真係辛苦哂老公呀，不過比得佢湊，都預左屋企混亂過混亂，睇電視睇足一日等等，算啦，我都要適當時候隻眼開隻眼閉了。 

我地個high tea本來係5點，但我地都覺得不如早少少出去，所以大約3點鐘就出到去，其實原來可以早D架，但我地兩個小朋友都吾知係咪feel到我地出街，又吾肯食野又吾訓，真係激氣。 好彩到最後搞左一輪我個女訓左，先可以快手咁出去咋，不過遇著subway又慢吞吞，我都坐左成兩個鐘車，真係人都癲。 anyway, 雖然天氣麻麻，咁都吾影響到我地咁開心既一日既，出到去，我地行下名店，扮下闊太，哈哈，真係幾鬼爽。 本來我地約左5pm, 但我地見都無咩好做，所以決定早D去到睇下可吾可以比我地早D坐，好彩既係，佢地都走得幾快，未夠5pm我地就坐低左。 我地兩個亞媽都好鬼興奮，因為真係勁難得，同埋我地買左個coupon, 大約$60兩個人，有D咁既服務又有咁好既美食，我覺得好值呀！ 不過可惜我個日開始有少少傷風，所以食到一個時間真係鼻都塞哂呀，慘慘！ 

其實個度既野食早已經準備好，所以都其實凍凍地。 總共有三層，第一層係有鹹點，但你問我係咩，我都已經吾係好記得，嘻嘻，不過幾好味。 中間個層，就係有D scone，佢個jam都吾差呀，其實我地坐咁耐真係食到第二層就已經飽啦，到甜點既時候已經要打包走人， 細食咩？ 又吾係，係掛住講野，講到無停口咁，哈哈，所以都未有機會食甜點時已經要返歸呀。  我地就係個度坐足3個鐘，其實有D人遲過我地去都已經走哂，我地都算係坐得最耐個兩位，哈哈，不過人地吾明，但我地就好明白，因為呢個機會真係10年難得一見。  雖然我老公話我中意去就去啦，但我都吾想經常丟低兩個女佢湊，而自己同朋友出去我又覺得好內疚，同埋，就算今次出去只不過係數小時，但我地都時刻contact老公睇下D小朋友點架，個心真係囉囉攣呢。  

好高興認識到呢位朋友，明白大家有小朋友出來不易，我都會好好珍惜呀。 希望將來會有更多呢D 機會啦！ 

第2日 ftm - 勇闖children musuem of manhattan

呢排又忙又病，已經又遺棄左個blog一排！ 好啦，我要努力追blog先得！

上篇講完第一日做ftm, 我既第二日ftm行程就係去children museum.   一早已經約左朋友去，個日一起身就出發，真係同無假放無分別，唯一係可以同個女去玩，不過都辛苦架，佢吾發脾氣時就好，一發既時候我真係好想丟佢落街，仲有大把大把咁車埋去，不過....都係我好嬲好嬲時先咁諗，現實中又點會同點容許我咁做。 anyway, 我地一早起行，其實雖然同hannah一個去，但要坐stroller上上落落subway都幾係野，加上吾係所有subway都有elevator, 好多時我就連人帶車咁搬佢上落，真係超辛苦。  跟住D人見到都吾會忙架，不過我無expect人地要幫既，但平時我自己一個時，我都會幫人手架。  

children museum of manhattan， 估吾到一去就去左成日，開頭仲諗，約左10點鐘，咁鬼早，驚無咁多野玩呀。  我地去到時已經10:30, 都無停過咁玩，係中途出左去食lunch, 之後就玩玩玩， 玩到成5點先走，我都覺得好勁！ 個museum有5層，我地開始時就去左basement玩，個度有個indoor playground咁， D小朋友係入面自己玩，我地可以係隔離睇實，之後有兩個人一齊唱歌跳舞，個度都聽左成個鐘呀，但又幾開心。 聽完玩陣之後，就食個lunch， 之後再玩。  下午時，我地就去玩陣水先，佢個玩水地方係outdoor, 但我又覺得幾好玩，可能吾算多人同埋新鮮啦，加上地方比較上乾淨，所以我都中意。 班小朋友就當然勁愛啦，所以我地係個度都hea左45分鐘，跟住因為有class關係，我地要趕去下場，係一個學整photo frame既class, 可惜我地去到無哂位，唯有轉移目標，去玩隔離既沙池，雖然之前個日先同hannah玩完沙沙，但佢去到沙池又狂玩，估吾到佢咁中意沙池wor....之後又有另一個class, 係jam band, 不過只不過係有D 樂器比佢地自己夾band, 有D無聊，但班小朋友又點會理，一齊過就已經開心到暈，哈哈。 呢個museum其實好多野玩呀，可能同埋佢有吾同既class可以去學野，又有人一齊講故事唱歌歌，幾開心呀！ 最重要係都算乾淨，同埋一層層咁，走失機會難D，所以都玩得安心呀！ 

雖然咁就過左一日，真係好鬼累，但見到佢咁開心，我都真係好好好開心呀！ 係走個陣佢cranky左一陣先訓覺，但我知佢已經好累架啦玩左一日，返到屋企個陣都忟左一排先肯食野，唉，算啦，一啖沙糖一啖屎，小朋友至愛！